ငြိမ်းချမ်းရေး ချိုးတစ်ကောင်နဲ့ ကိုယ်ရေးကိုယ်တာ
အကွေ့ (၁)
သုညအစ၊ သုညအလယ်၊ သုညအဆုံး၊
ကျွန်တော်က ဘ၀ကိုလွယ်လွယ် မရှုံးချင်ဘူး အမေ…
ကျွဲအကောင်ပေါင်းများစွာထဲက
ကျွန်တော်ဆိုတဲ့ မြေဇာပင်
အညွှန့်ကလေးက တထောင်ထောင်နဲ့ပေါ့…
လွန်ခဲ့တဲ့ အနှစ်သုံးဆယ်မှာ
မျှော်လင့်ချက် အကြီးကြီး ပိုက်ခဲ့တယ် အမေ…..
ပါးတစ်ဖက်က လျှိုတဲ့ဓါး
နောက်ပါးတစ်ဖက်က ထွက်တဲ့အထိ
ကျွန်တော် အသဲတယားယား
နံပါတ် (၄၀)ထဲက (၁) လျော့သွားတာ
ဘာမှပြဿနာ မဟုတ်သလို
ကျွန်တော့်ပါးစပ်ကို ငုတ်တုတ်ထိုင်ခိုင်းထားတယ်
အမေ….
သွေးဆိုတာ လိုသလောက်တော့ ထွက်ရမှာပဲ…
ကျွန်တော်မသိခဲ့ဘူး အမေ…
အလေးစားခံချင်တာလား…
အကြောက်ရွံ့ခံချင်တာလား…
အဲ့ နှစ်လတွေကြားမှာ
သားက ဘယ်နေရာမှန်းမသိ
ခရေပွင့်လေး ပခုံးပေါ်ကြွေဖို့အရေး
သား အတွေးက မက်မောမိနေတုန်းပဲ….
ပြန်မပြုံးမပြ နိုင်တော့ဘူးအမေ…
တစ် အခြေအနေ၊ နှစ် အခြေအနေ၊ သုံး အခြေအနေ၊
ကျွန်တော်တို့ ဘ၀က ရေလိုပဲ
အလွယ်တကူ ပုံကျလွယ်ခဲ့ပြီ
အမေသိရင် .. ဘာဖြစ်ဦးမလဲ….
ကျွန်တော့်လက်ထဲမှာ မြေပုံတစ်ချပ်
နောက်မာရ်နတ်ကို ထောက်လှမ်းဖို့ ကိရိယာ
ကျွန်တော် ဘာမှမရှိဘူး
ဒီအချိန် သားအတွေးရှင်းဖို့
အမေ့ကိုပါ မေ့ထားလိုက်တယ်
အရှေ့မှာ ထယ်ထိုးထားတဲ့ မြေ
ရဲဖို့အတွက် အကုန်လုံးမေ့ခဲ့ရတယ် အမေ…။
အကွေ့ (၂)
နံရံဖြူဖြူမှာ အစွန်းအထင်းတွေ
ကျွန်တော်တွေးလို့ မရဘူး
“ခင်ဗျား ဘာလို့ မဆက်သွယ်တာလည်း”
“အမေသိရင် စိတ်ဆင်းရဲမှာ ကျွန်တော်မဆက်သွယ်ချင်ဘူး”
တတိယ အကြိမ်မြောက် ခွဲစိပ်မှု
တံခါးဝမှာ တန်းစီထားတဲ့အချိန်
ပထမတစ်ယောက် ဖြတ်လျှောက်သွားတယ်
အဲ့ဒါ အစ်မအကြီးဆုံး
ဒုတိယမြောက် အနားမှာကပ်
“မင်းဘယ်လို ဖြစ်ရတာလဲတဲ့”
ဟုတ်ကဲ့အမေ…
ကျွန်တော် ပြန်ရောက်လာပြီ…
“အေး အမေသိပါသတဲ့”
“ငါသေတော့ ငါ့အသုဘ မင်းစီစဉ်
မင်းသေတော့ မင်းအသုဘ ငါစီစဉ်မယ်”
ငါက မင်းအမေပါဘဲ တဲ့လား အမေ…
ကျွန်တော် ၀မ်းနည်းတယ် အမေ…
သုည တစ်ခြမ်းအပဲ့ ပေမယ့်
ကျွန်တော်က တစ်မဖြစ်တော့ဘူး
အပြစ်တွေပြန်ရှာလိုက်တော့
ကျွန်တော် မြစ်ကို အလျားလိုက်ဆန်ခဲ့တာကိုး
ကျွန်တော် မရှုံးချင်ဘူး အမေ…
ဒီပြည်တွင်းစစ်ကို
ကျွန်တော် အနိုင်တိုက်ချင်တယ်….
အမေအပြုံးကအားရှိချင်စရာ
“သား မင်းက အမေ့သားပါဘဲ”
အဝေးမှာ ကြားရပြန်ပြီ
ရွှေပြည်တော်က မျှော်မဝေးတော့သလိုလို…
သားက ကုလားအုတ်တစ်ကောင်လို
သူဘို့… ကိုယ့်ဘို့ လို့မတွေးဘူး အမေ
သား ငြိမ်းချမ်းရေးကို ချစ်တယ်…
တစ်ချစ်တယ်၊ နှစ်ချစ်တယ်၊ သုံးချစ်တယ်…
အပြစ်ဆိုတာထက် အစစ်အမှန်
ကျွန်တော့် အပင်လေး ရှင်သန်စေချင်တယ်
ကျွန်တော်တို့ အိမ်ကလေးက
အမိုးနဲ့အကာက အပေါက်အပြဲ
အခြေတိုင်က ယိုင်နဲ့နေတဲ့အချိန်
ကျွန်တော် အစစ်အမှန်ကို ရှင်သန်စေချင်တယ် အမေ…
ပစ်ကြခတ်ကြ…
မိသားစုစကားဝိုင်း
ခပ်ရိုင်းရိုင်း အဖြစ်တွေပါ
ပါလာခဲ့ပြီ………
ဘ၀မှာရှိတဲ့ အသိတရား
ကျွန်တော် နှစ်ခါသေသွားပါစေ
အမေ ခွင့်လွှတ်ပေးပါဦးအမေ
ကျွန်တော် (၁၅) နှစ်လုံးလုံး
ကျွန်တော့်ယုံကြည်ချက်နဲ့
ဘယ်သူ့ကိုမှ မယုံကြည်တော့ဘူး
ကျွန်တော်သွားလိုက်ဦးမယ်…..
အမှောင်….
ရက်ပေါင်း (၁၂၀) ကျော်ကာလ
ငါ… မရှုံးစေရဘူး.. ဟေ့…
မှောင်တယ် ဆိုကတည်းက
လင်းဖို့အတွက်ပဲ….
အမေ မွေးခဲ့တဲ့သား
အမှားမရှိ
ကျွန်တော်(၁၅)နှစ်လုံးလုံး
လူဖြစ်ရှုံးခဲ့ရပြန်တယ်……….
အကွေ့(၃)
မဖြစ်၊ မဖြစ်၊ မဖြစ်တော့ဘူး….
ဒီမိုးက သည်းလို့ကောင်းတုန်းပဲ…
ကျွန်တော် မရှုံးချင်လို့
သွားဦးမယ်… အမေ….။
အမေရေ….
ညီလေးလည်း ကျန်းမာပါတယ်…
ညီမလေးက .. ပျော်လိုပြုံးလို့
ကျွန်တော့်ကို မြင်တော့
သူပျော်လို့ မျက်ရည်တွေတောင် ကျလို့
အမေ…
အမေနေကောင်းပါစေ…
အမေပျော်ပါစေ…
အမေမွေးတဲ့ အမေ့သားတွေ
အမေ ချစ်တဲ့ အမေ့သားတွေ
အမေ့ အကြောင်းတွေးတိုင်း
အမေ နေရစ်ခဲ့တဲ့ … ကျွန်တော်တို့တိုင်းပြည်
အမေ့လို ငြိမ်းချမ်းဖို့…
အမေ့သားတွေ အဝေးကတိုက်တုန်း….
(ကိုမျိုးမြင့်ချို အတွက်)
ကျေးတော်မျိုး
No comments:
Post a Comment